بدأ الأوكازيون الصيفي في معظم المحلات.. وفيه بعض المحلات الأوكازيون بيوصل فيها لـ 70%، وأنا شخصياً باشتري كل هدومي في الأوكازيون. وعشان كده هنتكلم النهارده مع بعض عن أهم 10 خطوات للشراء في الأو
أولا:
اشتري في الأوكازيون.. لكن اتفرج الأول
أكيد كلنا بننزل في بداية الموسم نتفرج على المحلات فيها إيه، وأكيد فيه حاجات بتشدنا وبتكون أسعارها غالية ومابنقدرش نشتريها.. ساعتها لازم نفتكر اسم المحل ومكانه فين ونستنى لغاية الأوكازيون لما ييجي ونروح نشوف نشتري الحاجة دي؛ لأن للأسف في مصر فيه بعض المحلات، خصوصاً في وسط البلد عندها خط إنتاج اسمه "الأوكازيون"، وده بيعتمد في موديلاته على خامات أقل في الجودة، وبالتالي بيكون أقل في التكلفة، وعشان كده سعره بينزل مش عشان هو كان غالي ونزل عليه الأوكازيون.
ثانيا:
اشتري اللي ناقص بس
حالياً احنا في نهاية فصل الصيف فبديهي أن الهدوم الموجودة في المحلات هدوم صيفي، وعشان كده هنشوف إيه اللي ناقص في دولابنا الصيفي وعلى أساسه هنحدد أولوياتنا في الشراء، وبلاش نشتري اى حاجة لمجرد إن سعرها مناسب حتى لو مش هتضيف لينا كتير.
ثالثا:
ابعد عن الألوان الموضة
لأن الأوكازيون بيكون في آخر الموسم فلازم اختيار الألوان في أي قطعة من الملابس نحاول تكون الألوان حيادية زي الأبيض والأسود والبيج والبني والرصاصي، ونبعد عن الألوان اللي معروف إنها موضة السنة دي على سبيل المثال شتاء 2007-2008 اللون البنفسجي الغامق هو الموضة فنبعد عنه تماماً؛ لأننا لما نلبسه السنة اللي بعدها هنبان وكأننا موضة قديمة وفي نفس الوقت مش هنكون عارفين إيه هي الموضة الجديدة.
رابعا:
خلي الألوان السادة اختيارك
وخصوصا في البلوزات فنحاول دائما نشتري الألوان السادة ونبعد عن المشجر والمنقوش، لأنها كلاسيكية وموضتها مابتروحش.
خامسا:
اشتري حاجات للصيف والشتاء
ولأن فيه بعض القطع من الملابس اللي يستحسن نشتريها في الأوكازيون؛ لأننا ممكن نلبسها في الصيف وبرضه في الشتاء؛ زي البنطلونات الجينز وهدوم الرياضة وقمصان البدل للرجال لأنها بتمشي في كل المواسم، خصوصاً الألوان الفاتحة منها.
سادسا:
قيس المازورة الأول
خصوصا واحنا بنشتري القمصان الكلاسيك تحديداً؛ لأن مقاستها بتختلف عن مقاسات القمصان الكاجوال يعنى مثلاً القمصان الكلاسيك مقاستها بتكون بالأرقام "15-16-17....." أو "38-39-40...." وعشان نعرف نحدد المقاس بنقيس قطر الرقبة بالمازورة والرقم اللي بيطلع هو اللى بنشتري على مقاسه، أما القمصان الكاجوال فمقاساتها بتكون “small – medim- large…” .
سابعا:
ملابس لكل المواسم
في بعض الهدوم الشتوية الخفيفة أو الصيفية التقيلة اللى بنسميها “Demi-Season” زي القمصان والسويت شيرتات، أو التيشيرتات اللي بكم طويل ودي بتنفع على مدار السنة ولو لقينا منها في الأوكازيون ياريت نشتري منها لأنها مفيدة جداً.
ثامنا:
مقاسات الأطفال الأفضل تكون كبيرة
بالنسبة للأطفال احنا ممكن نجيب لهم حاجات كتيرررررة جداً في الأوكازيون أهمها الأحذية والصنادل وفي بعض محلات الأطفال بتكون حاطه بواقي الموسم اللي فات حتى إننا ممكن نشتري مقاسات أكبر من مقاسهم الحالي، وده بينفع الأطفال لأنهم بيغيروا هدوم كتيرة في الصيف وكمان بيكبروا بسرعة، وبالتالي مقاساتهم بتتغير.
تاسعا:
السواريه كمان ليه نصيب
بالنسبة للسيدات والبنات اللي بيدوروا على فساتين سوارية ممكن يلاقوا حاجات كتيرررة في الأوكازيون بس بنأكد مرة تانية إن الألوان الحيادية حتى في السواريه أفضل فلو لقينا في الأوكازيون الألوان دي نقدر نشتريها ونشيلها للصيف.
عاشراً:
وفّر بس خد بالك
بالنسبة للرجال اللي بيشتغلوا في وظايف تستدعي إنهم يلبسوا بدل بشكل دوري ومنتظم يقدروا يشتروا في الأوكازيون بدلتين بسعر بدلة وطبعاً ده هيوفر لهم كتيررر بس نحاول دايماً نشتري البدلة اللي بزرارين، وتخلوا بالكم أن الأوكازيون هيكون غالباً على البدل اللي بـ3 زراير لأن الموضة دي خلصت وبالتالي المحلات هاتكون عايزة تتخلص من البضاعة دي.
وبكده نكون عرفنا 10 خطوات
تساعدنا في الشراء وقت الأوكازيونات
يارب تفيدكم وتعملوا بيها..
10 خطوات...10 خطوات...للشراء في الأوكازيونات 
النمط الخطي
